উত্তৰ লালুক গাঁও পঞ্চায়তত ২৪ লাখ টকাৰ নেমু বাগান কেলেংকাৰি

শতাব্দ ষ্টাফ ৰিপ’ৰ্টাৰ, লখিমপুৰ, ২৮ আগষ্টঃ লখিমপুৰ জিলাৰ কৰুণাবাৰী উন্নয়নখণ্ডৰ অন্তৰ্গত উত্তৰ লালুক গাঁও পঞ্চায়তত নেমু বাগান ৰোপনৰ নামত বৃহৎ কেলেংকাৰি সংঘটিত হোৱাৰ তথ্য পোহৰলৈ আহিছে৷ পঞ্চায়তখনত নেমু বাগান ৰোপনৰ বাবে আৱণ্টন হোৱা ২৪ লাখ ৫০ হাজাৰ টকাৰ ধন নেমু বাগান স্থাপন নকৰাকৈয়ে সৰকাই নিয়াৰ অভিযোগ উত্থাপিত হৈছে৷ প্ৰাপ্ত তথ্য অনুসৰি ২০২০-২১ বৰ্ষত উত্তৰ লালুক গাঁও পঞ্চায়তলৈ ২৪ লাখ ৫০ হাজাৰ টকাৰ ধন আৱণ্টন হয়৷ এনৰেগা আঁচনিৰ অধীনত গাঁও পঞ্চায়তখনলৈ ৯৮ জন হিতাধিকাৰীৰ প্ৰতিগৰাকীৰ বাবে ২৫ হাজাৰ টকাকৈ ধাৰ্য কৰা হয়৷ সেই মৰ্মে হিতাধিকাৰীসকলৰ নামত আৱণ্টিত সমূদায় ধন মোকলাই দিয়া হয় যদিও প্ৰকৃতাৰ্থত গৰিষ্ঠ সংখ্যক হিতাধিকাৰীয়েই নেমু বাগান স্থাপন নকৰিলে৷ অৱশ্যে ইয়াৰে কুৰিজন হিতাধিকাৰীয়ে নেমু বাগান ৰোপন কৰিছিল যদিও তেওঁলোকে আজিকোপতি প্ৰাপ্য ধন লাভ কৰিবলৈ সক্ষম নহল৷ ইয়াৰ বিপৰীতে নেমুবাগান স্থাপন নকৰাকৈয়ে গৰিষ্ঠ সংখ্যক হিতাধিকাৰীয়ে কৌশলেৰে এই ধন উলিয়াবলৈ সক্ষম হয়৷ ইয়াৰে ১২ হাজাৰ টকা উত্তৰ লালুক গাঁও পঞ্চায়তে হিতাধিকাৰীক জব কাৰ্ডৰ জৰিয়তে আদায় দিয়া দেখুৱালেও হিতাধিকাৰীসকলে তেনে ধন লাভ নকৰিলে৷ ইফালে কৰুণাবাৰী উন্নয়নখণ্ডই বাকী ১৩ হাজাৰ টকা হিতাধিকাৰী লৈ মুকলি কৰি দিয়ে যদিও হিতাধিকাৰীসকলে সেই ধনো লাভ কৰিবলৈ সক্ষম নহল৷ পঞ্চায়তখনৰ কনিষ্ঠ অভিযন্তা ভৰত দেউৰীয়ে এইসকল হিতাধিকাৰীয়ে নেমু পুলি ৰোপন নকৰাকৈ তেওঁলোকৰ নামত কেনেদৰে বৃহৎ পৰিমানৰ ধন মুকলি কৰি দিলে তাক লৈ ৰহস্যৰ সৃষ্টি হৈছে৷ এই ক্ষেত্ৰত উত্তৰ লালুক গাঁও পঞ্চায়তৰ সভাপতি মণিষা দেউৰী, আঞ্চলিক পঞ্চায়ত সদস্য কণমাই দেউৰী, সচিব বিকাশ গগৈ, জি আৰ এছ যাদৱ ফুকন, মধ্যভোগী ৰূপম বৰা আদিৰ নাম উচ্ছাৰিত হৈছে৷ তেওঁলোকে নেমু বাগান স্থাপন নকৰাকৈ তেনে হিতাধিকাৰীৰ নামত ২৪ লাখ ৫০ হাজাৰ টকা কেনেদৰে মোকলাই দিলে সেয়া লক্ষণীয় বিষয়৷ সমগ্ৰ বিষয়টো তদন্ত কৰিলেই সকলো পৰিস্ফুট হোৱাৰ লগতে দোষী ব্যক্তি শাস্তিৰ সন্মুখীন হোৱাতো নিশ্চিত৷ ইফালে এইখিনিতে উল্লেখ কৰিব পাৰি যে গাঁও পঞ্চায়তখনৰ অন্তৰ্গত ২ নং জৰিগুৰিৰ কেশৱ শইকীয়াই এবিঘা মাটিত নেমু বাগান ৰোপন কৰাৰ পিছতো আৱণ্টিত ধনৰ কেৱল ৯ হাজাৰ টকাহে লাভ কৰিবলৈ সক্ষম হয় বুলি কয়৷ তদুপৰি কেশৱ শইকীয়াই কয় যে নেমু বাগানৰ ধন বিছাৰি পঞ্চায়তলৈ যোৱাৰ সময়ত ধনৰ ডিমাণ্ডৰ নামত পঞ্চায়ত কৰ্মীক তিনিবাৰত ১৫ শ টকা উৎকোচ দিব লগা হয় বুলি সাংবাদিকৰ আগত ব্যক্ত কৰে৷